ZAKAT KA BAYAAN- HINDI- ZAKAT KE EHKAM- AHMIYAT IN ISLAM

بسم الله الرحمان الرحیم 

ZAKAT KA BAYAAN:

Al Quran : Zakat mufliso aur mohtajon aur uska kaam karne walon ka haq hai aur jinki diljoyee karni hai aur gulam ki gardan churhane mein aur 

Qarzdaron ke Qarz (ada karne) mein aur Allah ki raah mein aur

musafir ko ye Allah ki taraf se muqarrar kiya hua hai aur

Allah janne wala hikmat wala hai

Surah Tauba (9) , Verse 60

(Aye Rasool’Allah!) Aap Farmao,

Beshaq! Mera Rab Rizq Wasi’a Farmata Hai Apne Bando Me Jiske Liye Chahe

Aur Tangi Farmata Hai Jiske Liye Chahe

Aur Jo Cheez Tum Allah Ki Raah Me Kharch Karo

Uske Badley Aur Dega Aur Woh Sabse Behtar Rizq Dene Wala Hai.

– (Sureh-Saba-34, Ayat 39)

Unki Misaal Jo Apne Maal Allah Ki Raah Me Kharch Karte Hai

Uss Dane Ki Tarah Hai Jisko Saat Baali Nikley Aur Unn Har Baaliyon Me Se Sou-Sou Daane Nikle

Aur Allah Uss Se Bhi Zyada Barhaaye Jiske Liye Chahe Aur Allah Wus’at Wala Ilm Wala Hai.

– (Sureh-Bakrah-02, Ayat 261)

Zakat San 2 Hijri Me Musalmano Par Farz Hui,Islam Me Shuru Se Hi Garibo Ki Madad Karne Par Tawajjoh Dilai Jati Thi. Par Iske Liye Koi Mukammal Qayda Nahi Tha. Daulatmand Jo Bhi Karte Apne Dilse Karte The. ALLAH Subhan Wa Ta'ala Ne Zakat Ko Islam Ka 3ra Rukn Karar Diya Aur Ab Musalmano Par Zakat Farz Hui.

Allah ta’ala farmata hai kamyabi pate hain wo log jo zakat adaa krte hai aur farmata hai jo kuchh tum kharch kroge Allah ta’ala uski jagah aur dega

aur Allah behtar rozi dene wala hai,aur farmata hai jo log bukhal karte hai uske sath jo Allah ne apne fazal se unhe diya wo ye gumaan na kare ki yeh unke liye achha hai balki yeh unke liye bura hai usi cheej ka qayamat ke din unke gale mein TauQ dala jaega jiske sath Bukhal kia hoga.

Zakaat Kin pe Farz hai?

( 1 ) Musalman Hona Yani Kafir Par Zakaat Farz Nahin

( 2 ) Baligh Hona Yani Na Baligh Par Zakaat Farz Nahin

( 3 ) Aaqil Hona Yani Deewane(Pagal) Par Zakaat Farz Nahin

( 4 ) Azaad Hona Yani Laundi Ghulam Par Zakaat Farz Nahin

( 5 ) Maalike Nisaab Hona Yani Jis Ke Paas Nisaab Se Kam Maal Ho Us Par Zakaat Farz Nahin

( 6 ) Pure Taur Par Maalik Ho Yani Is Par Qabza Bhi Ho

Tab Zakaat Farz Hai Warna Nahin

Maslan Kisi Ne Apna Maal Zameen Mein Dafan Kar Diya Aur Jagah Bhool Gaya

Fir Barson Ke Baad Jagah Yaad Aai

Aur Maal Mil Gaya Toh Jab Tak Maal Na Mila Tha Us Zamane Ki Zakaat Wajib Nahin

Kunki Nisaab Ka Maalik Toh Tha Magar Is Par Qabza Nahin Tha

( 7 ) Nisaab Ka Qarz Se Faarigh Hona

Agar Kisi Ke Paas Ek Hazar Rupye Hai

Magar Woh Ek Hazar Ka Maqrooz Bhi  Hai Toh Us Ka Maal Qarz Se Faarigh Nahin

Lihazah Us Par Zakaat Nahin

( 8 ) Nisaab Ka Hajate Asliya Se Faarigh Hona

Hajate Asliyya Yani Aadmi Ko Zindagi Basar Karne Mein Jin Chizon Ki Zarurat Hai

Maslan Apne Rahne Ka Makan Jadey Garmiyon Ke Kapde Gharelu Saman

Yani Khane Pine Ke Bartan Charpaiyan Kursiyan Mezein Chulhe Pankhe Waghairah

In Maalon Mein Zakaat Nahin Kunki Yeh Sab  Malo Saman Hajate Asliyya Se Farigh Nahin Hain

( 9 ) Maale Nami Hona Yani Badhne Wala Maal Hona

Khwah Haqeeqatan Badhne Wala Maal Jaise Maale Tijarat

Aur Charayi Par Chhodey Hue Janwar

Ya Hukman Badhne Wala Maal Ho Jaise Sona Chandi

Ki Yeh Isi Liye Paida Kiye Gae Hain Ki In Se Chizen Kharidi Jayen

Aur Bechi Jayen Taki Nafa-a Hone Se Ye Badhte Rahen

Lihazah Sona chandi Jis Haal Mein Bhi Ho Zewar Ki Shakl Mein Hon

Ya Dafn Hon Har Haal Mein Yeh Maale Nami Hain

Aur Inki Zakaat Nikalna Zaruri Hai

( 10 ) Male Nisaab Par Ek Saal Guzar Jana

Yani Nisaab Pura Hote Hi Zakaat Farz Nahin Hogi

Balki Ek Saal Tak Woh Nisaab Milk Mein Baqi Rahe Toh

Saal Pura Hone Ke Baad Is Ki Zakaat Nikali Jaye

                   

Sone Ka Nisab Sadhe Saat Tolah Hai

Aur Chandi Ka Nisab Sadhe Bawan Tolah Hai

Sone Chandi Main Chaliswan Hissa Zakaat Nikaal Kar Ada Karna Farz Hai

Yeh Zaruri Nahin Ki Sone Ki Zakaat Mein Sona  Hi

Aur Chandi Ki Zakaat Mein Chandi Hi Di Jaye

Balki Yeh Nhi Jayez Hai Ki Bazari Rate Se Sone Chandi Ki Qeemat Laga Kar Rupye Zakaat Mein Dein.

----------------------------------------------------------- 

Pahanne ke Zewraat ki zakat

-----------------------------------------------------------

 Amr ibn al-'As Radi Allahu Anhu se rivayat hai ki Ek Aurat Rasool-Allah Sal-Allahu Alaihi Wasallam ke pass aayee uski beti bhi uskey saath thi aur uski beti ke haath mein soney (gold) ke do bade bade kangan they Aap Sal-Allahu Alaihi Wasallam ne pucha kya aap in kangano ki zakat dete ho ? usney kaha nahi , Aap Sal-Allahu Alaihi Wasallam ne farmaya kya aapko ye pasand hai ki Qayamat ke din Allah aapko Aag ke kangan pahnaye ye sunkar usne usi waqt kangan utar diye aur aapki khidmat mein pesh kartey huye kaha ki ye Allah aur uskey Rasool-Allah Sal-Allahu Alaihi Wasallam ke liye hai

Sunan Abu Dawud, Jild 1, 1550-Hasan

 Abdullah bin shaddad Radi allahu anhu se rivayat hai ki hum log Aisha Radi allahu anha se paas gaye wo kahne lagi merepaas Rasool-Allah Sal-Allahu alaihi wasallam aaye Aapne mere haath mein chandi ki anguthiyan dekhi aur farmaya , Aisha ye kya hai ? maine arz kiya ki ye maine isliye banwayee hai ki aapke liye banao singar karu , Aap Sal-Allahu alaihi wasallam ne pucha , kya aap inki zakat ada karti ho maine kaha nahi , ya jo ALlah ko manzur tha kaha Aap Sal-Allahu alaihi wasallam ne farmaya ye aapko jahannam mein je jaane ke liye kaafi hai (agar aap zakat nahi dogi to)

Sunan Abu dawud, Jild 1, 1552-Sahih

Abu Hurairah radi allahu anhu se rivayat hai ki Rasool-Allah Sallallahu Alaihi Wasallam ne 

farmaya ki jisey Allah ne maal diya aur usney uski zakaat ada nahi ki to Qayamat ke din uska Maal nihayat zahreeley ganjey saanp ki shakal ikhtriyar kar lega uski aankhon ke pass do siyah(black) nuqtey honge jaise saanp ke hote hain phir wo saanp uskey dono jabdo se usey pakad legaaur kahega ki main tera maal aur khazana hun 

Sahih Bukhari , Jild 2, 1403